LAOAG CITY – Inlungalong ni Senador Christopher “Bong” Go ti pannakaestablisar ti “halfway houses” wenno lugar a mabalin a temporario a pagtarusan dagiti taga-bantay ti pasiente nga asideg kadagiti ospital.
Inpaganetgetna a napateg a bigbigen dagiti pagannurotan ken programa dagiti patient watchers kas paset ti healthcare equation gapu ta dagitoy ti tumultulong iti recovery wenno panagimbag ti maysa a pasiente.
Dinakamatna nga agsinnublat dagiti pamilia nga agbanbantay kadagiti pasienteda ken dakkel a tulong no maaddaan ti halfway houses nangruna kadagiti pamilia a manipud pay kadagiti adayo a lugar.
Inbatadna nga uray simple laeng a tulong kas ti taraon wenno plete ket dakkel a nam-ay iti gastosen ti maysa a pamilia nga adda ti banbantayanna a pasiente.
Karaman kadagiti naikkanen ti halfway houses wenno adda pay laeng iti proseso ti pannakaikabil dagitoy ket masarakan iti University of the Philippines-Philippine General Hospital, Quirino Memorial Medical Center, Southern Philippines Medical Center, Philippine Children’s Medical Center, Philippine Heart Center, ken Dr. Jose Rodriguez Memorial Hospital.
