LAOAG CITY – Inpasigurado ti Department of Public Works and Highways (DPWH) nga agtultuloy ti panangaramidda ti wagas tapno maiyurnos ti framework dagiti budget ti ahensia kadagiti sumaruno a tawen.
Iti maysa a forum, inbatad ni Department of Public Works and Highways Secretary Vince Dizon a saanen nga usaren ti formula ti pimmusay a ni dati nga Undersecretary Catalina Cabral nga addaan kadagiti allocable ken non-allocable a maaw-awagan iti pundo.
Inbatadna a nupay datin a pagannurotan ti gobierno iti panangtingiting iti prioridad nga infrastructure projects kas pagalagadan ket saan met nga agbalbalin a kanayon iti implementasion daytoy.
Iti agdama, manarimaan ti pannakaipinal ti baro ken ad-adda a simple a budgeting ken infrastructure budget allocation framework a manipud iti konsultasion iti civil society groups, pribado a sektor ken business organizations.
Naammoan nga apaman a mabukel ket iprisentar daytoy ken ni Presidente Ferdinand Marcos Jr. ken iti Department of Budget and Management tapno maaprobaran.
Immunan nga inrakurak ni Navotas Rep. Toby Tiangco iti kapada a forum a nakasagana daytoy nga agserbi kas sponsor ti gakat para iti panangidatag ti framework iti budgeting process.
