LAOAG CITY – Inbilin ti Department of the Interior and Local Government (DILG) ti naiget a panangipatungpal ti Anti-Epal policy iti intero a pagilian.
Gapu iti daytoy, insigida nga ikkaten dagiti nagan ken ladawan dagiti pulitiko kadagiti amin a proyekto, programa, aktibidad ken kadagiti sanikua ti gobierno.
Daytoy a pammilin ket para kadagiti amin a lokal a gobierno ken Department of the Interior and Local Government offices iti intero a pagilian iti bileg ti memorandum nga inparuk-at ti ahensia.
Inpetteng ni Sec. Jonvic Remulla a dagiti proyekto ti gobierno ket binayadan dagiti tattao ken nasken a saan nga usaren para iti personal a promosyon.
Mainaig iti daytoy, ginutigot ni Remulla ti publiko nga i-report dagiti makita nga aglabsing iti nasao nga Anti-Epal Policy.
