LAOAG CITY – Saan nga inaprobaran ti Sangguniang Panlungsod ti inlungalong ni Konsehal Jason Perrera iti pannakaputar ti ordinansa mainaig iti corruption tapno awan ti mapasamak a panagkunniber ditoy siudad ti Laoag.
Segun kenkuana, maibilang ti panagkunniber kas maysa a cancer ken dakkel ti epektona saan laeng iti ekonomia ken pulitika no diket iti panagbiag ti maysa nga indibidual.
Inbatadna a gapu iti panagkunniber ket adda dagiti investors a saanda nga ipursige ti panagnegosioda ditoy pagilian, adda dagiti umili a mapilitan nga agtrabaho iti ballasiw taaw ken bumaba ti revenue a mapastrekan ti gobierno.
Inlawlawagna a kabayatan ti panagtulid ti panawen ket agbalbalinen a gagangay kadagiti opisial ti gobierno ti panagkunniber banag a maikanniwas daytoy iti paglintegan.
Kunana nga umad-adu dagiti marigrigat a Pilipino gapu iti kumarkaro a panagkunniber a mapaspasamak ditoy pagilian.
Maipalagip a kalikagum ni Konsehal Perrera a maamendaran ti City Ordinance No. 2022-033 a maysa nga ordinansa a mangbukel ti special committee on bidding iti pannakaiyuswat ti fiesta carnival ken baratillo.
Mainaig iti daytoy, inrakurak ni Konsehal Donald Nicolas a saan a mabalin nga agbalin a miembro dagiti naelektaran nga opisial ti gobierno kas maibasar iti Republic Act No. 12009.
Immuna iti daytoy, inpeksa ni Konsehal Perrera ti pannakadismayana iti nagbalin a desision dagiti padana nga agpanpanday linteg babaen ti panag-privilege speech daytoy iti konseho.
