LAOAG CITY – Suportaran dagiti health at child rights advocates ti panawagan ni Health Secretary Teodoro Herbosa nga ipangato ti minimum age iti panaggatang ti vape ken tobacco products iti agtawen ti 25 ken nayunan ti buwis dagiti nicotine products.
Segun iti Philippine Tobacco Control Coalition, kasapulan ti naig-iget a regulasyon tapno maprotehiran dagiti agtutubo kontra iti nicotine addiction.
Dinakamat da ti nataltalged a vaping no ikompara iti tradisyunal a sigarilyo ken nangitunda daytoy iti umuna a nairekord a pannakatay iti pagilian nga adda ti pakainaigan iti e-cigarette wenno vape.
Inpetteng ni Herbosa a no isuna laeng ti masurot ket naan-anayen a maipawil ti panagusar ti vape iti pagilian gapu kadagiti dakes nga epekto na iti salun-at ti panag-vape wenno panagsigarilyo.
Inpaganetget met ti coalition ti E-cigarette or Vaping Use-Associated Lung Injury (EVALI), maysa a baro a sakit ti rimuar kagiddan ti panagraira ti e-cigarettes ken vape products.
Naipakita pay iti datos a maysa iti kada pito nga estudyante iti Pilipinas ket agus-usar ti vape.
Inlungalong dagiti advocates a malaksid iti panangipangato iti tawen a 25 dagiti mapalubusan nga agusar ti vape ken panagnayun ti buwis ket rumbeng a kadagiti sumarsaruno a gundaway ket maminpinsanen nga ipawil ti amin a vape, sigarilyo, heated tobacco products, ken nicotine pouches.
