LAOAG CITY – Inrakurak ni Atty. Jason Perera a ti International Criminal Court (ICC) ket nabukel tapno mangipaay ti hustisya kadagiti tattao a biktima iti human rights violation.
Segun kenkuana, ti kangrunaan nga im-imbestigaren da ket dagiti opisyales ti gobierno wenno government leaders.
Inbatad na a daytoy ket gapo ta 95% ti saan a maisaksaklang a lider iti bukod na a pagilian aglalo nu daytoy ket dati a presidente ken agdama a presidente.
Innayon na a dakkel ti posibilidad na a kaadwan ket kanunongan wenno ilimed da ti saan a napintas nga inaramid iti maysa a lider.
Gapo iti daytoy, kunana a rumbeng laeng nga agkiddaw ti tulong iti maysa a grupo wenno organisasyon kas iti International Criminal Court a maibilang nga impartial wenno adayo ti impluwensiya ti maysa a gobierno.
Nupay kasta, inpalgak ni Atty. Perera a saan a makastrek ti International Criminal Court no awan ti pammalubos ti presidente iti maysa a pagilian.
Inpetteng na a rumbeng a sangwen dagiti opisyal dagiti akusayon a maibato kadakwada gapo ta no mapaneknekan a guilty da ket rumbeng a maibalod ngem nu saan ket awan met ti saan a napintas a mapasamak kadakwada.
Rakurak daytoy ni Perera kalpasan ti pannakaarestar ni dati a Presidente Rodrigo Duterte iti Ninoy Aquino International Airport Terminal 3 (NAIA 3) babaen ti warrant of arrest nga inisyu ti International Criminal Court (ICC) gapu iti kaso na a crimes against humanity, ken isu ti kaunaan a nagbalin a Presidente ti Pilipinas a natiliw babaen iti pammilin ti international tribunal.
