LAOAG CITY – Balligi a naisayangkat ti maika-120 a tawen a panagkasangay ni dati a Gov. Roque B. Ablan Sr. iti Barangay 20 ditoy siudad ti Laoag.
Daytoy ket iti baet ti napigsa a tudo a mapaspasaran ditoy probinsia.
Naisayangkat ti wreath-laying ken panangidaton kadagiti sabsabong babaen iti Philippine National Police iti mismo a Gov. Roque B. Ablan Sr. Shrine.
Malaksid iti daytoy, naipaayan pay ti 21 Gun Salute ni dati a Gov. Ablan Sr. babaen iti Philippine Marines.
Nagatendar iti nasao nga aktibidad da Gov. Cecilia Araneta Marcos, Mayor James Bryan Alcid, City ken Provincial Government officials ken dadduma pay pakairamanan ti pamilia Ablan.
Segun ken ni Department of Economy, Planning and Development of the Philippines Sec. Arsenio Balisacan, napateg nga iselebrar daytoy nga aldaw gapu ta nasken laeng a malagip dagiti Pilipino kangrunaanna kadagiti Ilokano ti kontribusion ken sakripisiona tapno saan a masakup dagiti Hapon ti pagilian.
Inpettengna a masapul laeng a mabigbig dagiti naaramidna kabayatan ti pannakilabanna para iti pagilian nangruna ket maibilang daytoy a bannuar idi World War II.
Mainaig iti daytoy, inlawlawag ni Liga ng mga Barangay President Roque Benjamin Ablan, maysa kadagiti apoko ni dati a Gov. Ablan Sr. a rumbeng laeng a maimula kadagiti kapanunotan kadagiti umili nangruna iti baro nga henerasion nga insakripisio ti lolona ti bukudna a biag tapno laeng magun-od ti panagwaywayas ditoy pagilian.
Inpakaammona pay a saan a pulos a masubadan ti nagbalin a kontribusion ni dati a Gov. Ablan Sr. iti pakasaritaan ti pagilian.
