LAOAG CITY – Inrakurak ni Presidente Ferdinand Marcos Jr., a ti panangpapigsa ti Pilipinas iti military capability daytoy ket tapno idepensa ti pagilian kontra iti aniaman nga agresyon manipod kadagiti dadduma a pagilian.
Daytoy ti inbatad ti Presidente iti Shangri-La Dialogue iti Singapore kaduana dagiti lider ken defense ministers ti nagduduma a pagilian iti lubong.
Kunana nga adda iti proseso ita ti Pilipinas iti panangbiruk ti suppliers para iti modernization program Horizon 3 ti Armed Forces of the Philippines.
Inlawlawagna a ti nasao nga addang ti Pilipinas ket mangipaay ti napintas a defense posture iti pagilian iti babaen ti Unilateral Defense Plan.
Inpetteng ti Presidente a target ti administrasionna sakbay daytoy a bumaba iti puesto ket mapapigsa ti depensa ti pagilian gapu ta ti depensa iti teritorio ket isu ti responsibilidad ti gobierno.
Inpasingked pay ti Presidente a saanna nga ipalubos nga adda ti suldado wenno coast guard personnel ti masugatan isu a mapaigetan pay ti presensiya iti West Philippine Sea.
