LAOAG CITY – Inpasigurado ti Department of Labor and Employment nga agtultuloy a tutukanda ti panangpartuat dagiti trabaho para kadagiti Pilipino.
Iti baet daytoy, ngimmato ti bilang dagiti Pilipino nga addaan ti trabaho a dumanon iti 48.672 a milyon idi Abril.
Basar iti Department of Labor and Employment, mangipasimudaag daytoy iti natibker a tukad ti employment iti pagilian kas ti nakita iti kapada a panawen iti napalabas a tawen.
Pammaneknek daytoy iti panagdur-as dagiti nagduduma nga industria nga agresulta iti oportunidad iti dumakdakkel a workforce ditoy pagilian.
Naammoan a karaman kadagiti sektor a dinakamat ti Department of Labor and Employment a nakitaan ti panagdur-as ti administrative and support service, public administration and defense, agriculture and forestry, construction ken education.
Inpannakkel ti Labor Department ti panagtalinaed a nababa ti unemployment rate a 4.1% idi Abril a katukad ti 2.06 a milyon.
Kabayatanna, ipakpakita dagiti datos ti nagbalin nga adaptable dagiti Pilipino a mangmangged iti baet dagiti sumagmamano a problema kas ti education job mismatch, skills-job mismatch ken geographical disparities.
Iti agdama, agtultuloy ti Department of Labor and Employment iti panangbukel kadagiti pagannurotan para iti employment, panagasa ti kabaelan dagiti mangmangged ken panangpalawa iti access iti pamastrekan ken trabaho iti intero a pagilian iti babaen ti Trabaho Para sa Bayan Plan 2025-2034.
