LAOAG CITY – Naragsak nga inpakaammo ni Ms. Flenie Galicinao, Officer In Charge ti Rodolfo CG Fariñas Jr. National Science High School iti Brgy. Vira ditoy siudad ti Laoag a balligi ti pannakaisayangkat ti umuna nga aldaw ti klase dagiti estudiante ita nga aldaw.
Segun kenkuana, naiyuswat ti flag raising ceremony nga inatendaran dagiti 55 nga agad-adal pakairamanan dagiti mangisursuro ken ni Acting Mayor Rey Carlos Fariñas.
Inbatadna a babaen iti tulong ti lokal a gobierno ditoy siudad ti Laoag ket masolbar dagiti amin a problema a makaitunda ti pannakaapektar ti panagbasa dagiti estudiante.
Inlawlawagna nga iti agdama ket generator ti us-usarenda pay laeng tapno maaddaanda ti serbisio ti kuriente a kasapulan iti panangisuro kadagiti maseknan nga agad-adal.
Inpalgakna a kadagupan kadagiti 48 a klasrum iti nasao a pagadalan ket dua pay laeng ti kabaelan ti generator a masuplayan ti kuriente.
Mainaig iti daytoy, saan nga inlibak ni Galicinao nga adu pay dagiti masapol a maisimpa iti nadakamat a pagadalan tapno naan-anay a mausar amin dagiti pasilidad a makatulong kadagiti estudiante ken mangisursuro.
Kunana a manamnama a mangiwayat ti evaluation ita nga aldaw ti Department of Public Works and Highways – 1st District Engineering Office ken City Engineering Office ditoy siudad ti Laoag tapno makita no nakapasada kadagiti naiyetnag a pagannurutan.
Innayonna nga apaman a maiplastar dagiti amin a kasapulan a dokumento ket dagusda nga ipasa dagitoy iti Ilocos Norte Electric Cooperative tapno naan-anayen a maikkanda ti koneksion iti kuriente.
Naammoan nga adda ti tallo a permanente a mangisursuro idinto nga adda met ti lima a mangisursuro nga agsusueldo babaen iti Local Government Unit ditoy siudad ti Laoag.
Kabayatanna, iti agdama ket manarimaan pay laeng a maipaspasdek ti dormitorio ti Rodolfo CG Fariñas Jr. National Science High School a manamnama a mabalinton a mausar inton 2025.
Maipalagip a saan a naglukat ti nasao a pagadalan iti umuna nga aldaw ti klase idi Hulio 29 kalpasan nga awan ti kurientena ken maipagarup a natakaw ti waya ti generator daytoy.
