LAOAG CITY – Manamnama a rugianen dagiti regional wage boards ti panangtingiting iti minimum wage rates maiyallubog metten iti pammilin ni Presidente Ferdinand Marcos Jr.
Segun ken ni Department of Labor and Employment Secretary Bienvenido Laguesma, umuna a mangisayangkat ti review ti Regional Tripartite Wages and Productivity Boards iti National Capital Region inton sumaruno a lawas.
Sarunuen met daytoy dagiti 10 pay a regional wage boards inton Hulio wenno Agosto.
Inbatad ni Laguesma a paset ti panangtingiting ti panangisayangkat ti public consultations ken public hearings.
Adda pay ti maiyuswat a panagtataripnong ti Regional Tripartite Wages and Productivity Boards no sadino maikonsiderar dagiti inputs, opinyon ken posisyon dagiti nakipaset iti public consultation ken hearing.
Manamnama a dagus met a mangiparuk-at ti wage boards ti wage orders maibasar iti resulta ti konsultasion.
