LAOAG CITY – Awan ti sabali a babalawen iti pannakaarestar ni dati a Presidente Rodrigo Duterte no di ket iti mismo a Duterte administration.
Daytoy ti nagbalin a sungbat ti Palasyo kadagiti pammabalaw no apay a saan pay laeng a dinengngeg ti kaso ti dati a Presidente ditoy Pilipinas sakbay a naikabil iti International Criminal Court (ICC) a mangipakpakita laeng a nakapsot ti justice system ti pagilian.
Inbatad ni Palace Press Officer Claire Castro, ti rumbeng a kwestionaren ditoy ket ti administrasion Duterte gapu ta idi Nobiembre 2021, nagkiddaw ti napalabas nga administrasion iti International Criminal Court a masuspenso pay laeng ti imbestigasion iti war on drugs ken nagkari a mangiwayat ti bukud a panagsukisok ken pagsungbaten dagiti adda ti basolna.
Nupay kasta idi Hunio 2022, sakbay pay a nagsapata ni Presidente Ferdinand Marcos Jr. iti puesto, kuna ti International Criminal Court prosecutor a saan a natungpal ti administrasion Duterte ti inkarina a mangiwayat ti imbestigasion ken kasoan dagiti responsable iti extra judicial killings (EJKs).
Inpetteng ni Castro ti saan a panagtignay ti administrasion Duterte ti nangiduron ti International Criminal Court nga arestaren ti dati a Presidente ken saan a nagbayag ket inyakarda isuna idiay The Hague, Netherlands.
Inlawlawag ni Castro, nasayaat gapu ta narugian ti panagdengngeg iti Quad Committee iti Kamara ket ditoy a naibutaktak ti pudno a napaspasamak iti war on drugs ni dati a Presidente Duterte.
