LAOAG CITY – Addan ditoy Ilocos Norte dagiti pannakabagi tit Shandong, China.
Daytoy ti pinasingkedan ni Mr. Edwin Carino, mangidadaulo ti Sustainable Development Center wenno SDC.
Inbunannagna a daytoyen ti maikatlo a gundaway a bumisita dagiti taga Shandong ditoy Ilocos Norte.
Nupay kasta, inlawlawagna a dakkel a tulong daytoy gapu ta gagem ti ibibisita da iti biang ti gobierno ti pannakapapigsa ti panagkakammayet ken panagtitinnulong iti benneg ti agrikultura, infrastractura ken iti komersio idinto nga iti business sector ket adda ti innem a klase ti negosio dagiti karaman iti grupo.
Segun kenkuana, maisayangkat ti welcome program iti grupo dagiti taga Shandong ita a bigat ti Agosto 22 iti session hall ti Sang. Panlalawigan.
Imbatadna a kalpasan ti ababa a programa ket agsina dagiti maiyuswat a forum iti benneg ti gobierno ken iti business sector.
Kunana a maiyuswat ti taripnong iti benneg ti gobierno iti opisina ni Gob. Imee Marcos idinto nga iti business sector ket agtataripnong da iti session hall ti Sang. Panlalawigan.
Inlawlawagna nga adda ti pito a grupo ti business sector ngem adda ti agpada ket m,agrupo-grupo dagitoy iti innem ket sangwen ida dagiti maiyataday a kasaritada kadagiti nadumaduma nga areas.
Innayonna a malaksid kadagiti manipud iti benneg ti panagnegosio ket adda pay dagiti makipaset a maseknan iti nadumaduma nga ahensia ti gobierno kas iti panagminas ket dagiti manipud iti Department of Environment and Natural Resources.
