LAOAG CITY – Umaboten iti P347.37 million ti pakabuklan a balor ti pannakadadael iti sektor ti agrikultura a nairekord ti Department of Agriculture iti 6 a rehion iti pagilian gapu iti habagat ken kadagiti naglabas a bagyo.
Iti datos ti Department of Agriculture-Disaster Risk Reduction and Management Operations Center, sumurok 12 a ribu a mannalon manipud iti sumurok 10 a ribu nga ektaria ti kataltalonan ti naapektaran ti bagyo idinto a karaman met dagiti nadadael a mula ket ti pagay, mais ken livestock.
Umabot met iti 9,491 metric tons ti produkto ti nadadael gapu kadagiti panaglayus ken napigsa a tudo ken angin manipud iti Ilocos region, Cagayan Valley, Central Luzon, CALABARZON, MIMAROPA ken Western Visayas.
Kabayatanna, inpasigurado ti Department of Agriculture a maipaayan ti tulong dagiti naapektaran a mannalon kas ti libre a bin-i ti pagay, mais ken nateng.
Malaksid pay ditoy dagiti agas ken biologics para iti livestock ken poultry pakairamanan ti survival and recovery loan program wenno pautang a ₱25-thousand pesos nga awan ti interesna manipud iti Agricultural Credit Policy Council wenno ACPC.
