LAOAG CITY – Napintas ti nagbalin a resulta ti naisayangkat a public hearing mainaig iti pannakaestablisar ti special economic zone iti ili ti Pagudpud.
Inbatad Mayor Rafael Benemerito nga iti baet nga adda dagiti sumagmamano a mangkontra iti daytoy ket awaten na kas wagas tapno ad-adda pay a mapapintas ti plano.
Kunana a nangrugi daytoy nga ideya gapu ta ti ama da a dati a nagserserbi met iti nasao nga ili ket adda dagiti gundaway a napnapan idiay Subic ken inpakpakita na kadakuada idi babassit da pay no kasanu ti plastar iti lugar.
Malaksid iti daytoy, kuna ti mayor a dakkel met ti akem ti Invest Office iti pananggutigot kadakuada a mangkita kadagiti lugar a mabalin a pakaipasdekan ti proyekto gapu ta uray idi damo na nga agtugaw kas mayor ket ibagbaga da daytoyen.
Inpasingked ti Benemerito nga ikarigatan da a rugyan ti proyekto kabayatan a nakatugaw paylaeng ni Presidente Ferdinand Marcos Jr. ken isu metten ti maudi a termino na kas mayor.
Inlawlawagna nga inpakaammo na a nasayaat daytoy nga ideya kadagiti residente babaen ti panangilawlawagna a masapol nga adda ti pagbanagan dagiti saan a maus-usar a lote ket immanamong met dagitoy.
Innayon na a nupay saan a requirement ti panangaprobar ti Sang Panlalawigan iti resolusyon mainaig iti pannakaestablisar ti proyekto ket dakkel ti panagyaman na iti naiget a suporta ti probinsia iti kalikagomda.
Naamoan a 784 nga ektarya ti kalawa ti lote a pakaipatakderan ti nasao a proyekto no sadinno a masakupan na iti Brgy. Dampig, Tarrag, Ligaya ken Aggasi.
Kabayatanna, inaprisyar ni bokal Hanson Chua, chairman ti Committee on Trade and Industry ti lokal a gobierno iti ili ti Pagudpud gapu ta nakasaganada ken inadalda a nasayaat ti proyekto sakbay nga inpresentar da iti Sang Panlalawigan.
Kunana a ti nasao a proyekto ket dakkel ti benepisyona iti probinsia ken kadagiti umili gapu ta ad-adda pay a mapapintas ti ekonomiya ken ad-addo manen dagiti ma emplyo a residente.
Inlawlawagna a no adda ti maysa a bilyon a mapastrek ket 92 a milyon ti mapan iti probinsia ken 7.9 milyon ti mapan iti lokal a gobierno ti Pagudpud malaksid laeng kadagiti dadduma pay a mapastrekda.
Innayonna, a no ad-addo ti sumrek iti gobierno ket ad-ado met ti maipaay a tulong kadagiti umili.
Inbatad met ni Bokal Saul Lazo a nupay saan a kasapulan ti endorsement ti Sang Panlalawigan iti daytoy a gakat ti lokal a gobierno iti ili ti Pagudpud ket indasar latta dagiti maseknan ken mangipaneknek iti panagmaymaysa ken panagkikinnamayet da.
Para met ken ni Miss Rona Bueno iti Ilocos Norte Investment Office ket suportaran da daytoy nga addang.
