LAOAG CITY – Inlawlawag ni Dr. Rogelio Balbag, Executive Director ti Hospital Management Council ti gobierno probinsial ti Ilocos Norte nga adda dagiti gundaway a maitantan ti pannakai-deliver dagiti medical equipment manipud iti Department of Health.
Segun kenkuana, daytoy ket kalpasan a nabayag ti pannakai-deliver ti CT-Scan iti Bangui District Hospital.
Inbatadna nga awan pay idi ti pakaikabilan ti nasao a medical equipment gapu ta manarimaan ti pannakapasayaat iti nasao nga ospital.
Kunana a daytoy a proyekto ket karaman iti 75 a milyon a pisos a proyekto ti probinsia.
Mainaig iti daytoy, inpakaammona nga apaman a nalpas ti pannakaiplastar iti pakaikabilan ti medical equipment ket insigida met laeng daytoy a nai-deliver idi Disiembre 2024
Kabayatanna, naammoan nga adda dagiti requirements ti Department of Health a masapol a masurot ti pakaikabilan dagiti medical equipment iti maysa nga ospital.
