LAOAG CITY – Naragsakan ni House Committee on Public Accounts chairman ken Bicol Saro Partylist Rep. Terry Ridon ti pannakaibasura ti Quezon City Regional Trial Court (QC-RTC) iti kaso nga inpila ti mister ni Vice President Sara Duterte a ni Atty. Manases Carpio.
Inpetteng ni Ridon nga umno laeng nga inbasura ti QC-RTC ti kaso ni Carpio gapu ta awan ti pagibasaran iti daytoy ken pangriribok laeng iti pakabuklan a proseso ti panagpasungbat iti Bise Presidente.
Kuna ni Ridon a maysa nga abugado, public documents ti Income Tax Returns (ITR) ken dadduma pay a tax document isu a nasken a saan a konkontraen ni Carpio ti pannakaidatag dagitoy iti constitutional ken investigative proceedings kas ti impeachment.
Dinakamat ni Ridon a ti pannakaibasura kadagiti kaso nga inpila ni Carpio ket ad-adda a matutukan ti panagbubutos iti plenario ti Kamara de Representantes inton Lunes, Mayo 11 para iti impeachment kontra ken ni Vice President Sara.
