LAOAG CITY – Inlawlawag ni Provincial Election Supervisor Atty. Joel Gines nga awan ti kinapudnona ti agwarwaras nga impormasion a dagiti Automated Counting Machine ket agmalmalem a nakakonektar iti internet kabayatan ti eleksion.
Segun kenkuana, no nakakonektar daytoy kabayatan ti panagbubutos ket mabalin a ma-hack daytoy.
Nupay kasta, inpasingkedna a saan a mapasamak daytoy gapu ta maikonektar laeng ti internet inton agi-transmit-da ti datos.
Inlawlawagna a sakbayda nga ikonektar ti internet ket ag-print-da ti siam a kopia ti election returns a maited iti ballot box, dominant majority, dominant minority, Lakas, NP, PPCRV, NAMPREL, COMMISSION a mai-post tapno maisayangkat ti parallel count.
Innayonna nga adda ti maaw-awagan a quick count isu nga adda ti iparparuk-at a resulta ti PPCRV gapu iti siam a kopia ti election returns sakbay ti transmission.
