LAOAG CITY – Balligi a nainagunararan ti Rice Processing System Project nga agbalor iti 56.5 milyon a pisos iti Brgy. Ab-abut iti ili ti Piddig.
Segun ken ni Presidente Ferdinand Bongbong Marcos Jr., napateg daytoy a proyekto para kadagiti mannalon tapno makissayan ti gastosen dagitoy iti panagtalonda.
Inbatadna nga addan iti 146 a Rice Processing System Project ti naipasdek iti nagduduma a lugar iti intero a pagilian.
Inlawlawagna a kalikagumna nga amin a lugar ket mariknada ti in-inut a pannakabalbaliw ti panagdur-as ti panagtalon dagiti mannalon iti pagilian babaen kadagiti baro a teknolohia.
Maipalagip nga inpakaammo ni Director IV Dionisio Alvindia ti Philippine Center for Postharvest Development and Mechanization (PhilMech) – Nueva Ecija nga agbalor iti P56.5 million ti Rice Processing System Project no sadino ket nai-turn over iti Farmers Cooperative nga umuna a dumalan dagitoy iti business enterprise training, repair and maintenance ti rice mill ken binulan a monitoren ti PhilMech.
Naammoan a ti nadakamat a proyekto ket kabaelanna ti mangiproseso ti dua agingga tallo a tonelada ti bagas iti kada oras.
Mainaig iti daytoy, dakkel a benepisio ken tulong ti maipaay kadagiti sumurok maysa a ribu a mannalon manipud iti daytoy a proyekto gapu ta adda ti nayun a 30 a porsiento ti mapastrekanda.
Immuna iti daytoy, saan a natuloy ti pannakainagunar ti nasao a proyekto idi kalman gapu iti napigsa a tudo.
