LAOAG CITY – Inrakurak ti Department of Budget and Management (DBM) ti panangipaay ti gobierno ti medical allowance para kadagiti empleado ti gobierno a mangrugi ita a tawen 2025.
Daytoy ket basar iti inaprobaran ti Department of Budget and Management a Budget Circular No. 2024-6 a gagem a masurot dagiti pagannurotan iti pannakaipaay ti medical allowance a mangrugi a maipatungpal kadagiti kualipikado nga agpapaay ti gobierno manipud iti Fiscal Year 2025.
Maipaay daytoy kadagiti ahensia ti gobierno kas kadagiti state universities ken colleges, dagiti government-owned and controlled corporations (GOCCs) a saan a sakupen dagiti espesyal a linteg kas ti (Republic Act No. 10149 ken EO No. 150, s. 2021). Sakupen pay daytoy dagiti agpapaay ti lokal a gobierno ken dagiti lokal a water districts, aniaman ti estado iti trabaho – regular, casual wenno contractual; full-time man wenno part-time.
Daytoy nga inisyatiba ket naaprobaran iti babaen ti Executive Order No. 64 nga adda ti pirma ni Presidente Ferdinand Marcos Jr. a makaawat dagiti agpapaay ti gobierno ti P7,000 medical allowance iti tinawen tapno matulungan dagiti empleado iti gobierno a makaala kadagiti benepisio manipud iti Health Maintenance Organization (HMO).
