LAOAG CITY – Ibilang ni Mr. Greg Mendez, maysa a tricycle driver ditoy siudad ti Laoag a dakkel a nayon iti panagpasadada ti pannakaipalubos backride kadagiti tricycle ditoy siudad.
Segun kenkuana, ti mainayon a maysa a pasahero nga iluganda iti tricycle-da ket dakkel a tulong para kadakuada iti inaldaw-aldaw a panagpasadada.
Inbatadna a babaen iti daytoy ket adda bassit ti mainayon a maiyawidda para iti pamiliada nangruna ket adu ti paggastoan ken nangina dagiti magatgatang iti agdama.
Inlawlawagna a nasken nga idi pay koma a naipatungpal daytoy nga ordinansa a saan ket di nga iranada laeng ita a panawen ti eleksion.
Kunana a nabayagen nga ikidkiddawda daytoy a banag gapu ta adu met ti agpaspasada a tricycle iti sabali nga ili ken siudad ditoy probinsia nga adda ti backride-na.
Mangnamnama ni Mendez nga apaman a naan-anay a maaprobaran daytoy iti Sangguniang Panlungsod ditoy siudad ti Laoag ket saandanton nga ibabawi pay daytoy.
Maipalagip a naaprobaran iti maikadua a pannakaibasana ti ordinansa a pannakaipalubos ti backride kadagiti tricycle ditoy siudad ti Laoag.
Immuna iti daytoy, naammoan a rumbeng a dagiti tricycle driver ket addaan ti usto a footrest wenno armrest a pagkaptan dagiti ag-backride, sun cover wenno usto a linong ti likud, dagiti laeng agtawen ti 13 agpangato iti tawenna ti mabalin nga agian iti likud, agingga iti uppat nga indibidual ti mabalin nga ilugan dagitoy karamanen ti backride, addaan ti nalawag a silaw ken kasapulan nga agusar ti high visibility vest no rabii.
Kabayatanna, dumanon iti 200 a pisos ti multa dagiti saan a sumurot kadagitoy a pagganurotan.
