LAOAG CITY – Inlungalong ni Parañaque 2nd District Representative Brian Yamsuan nga ipangato ti sueldo dagiti mangisursuro iti special needs education (SNED).
Nakaipalaon daytoy iti House Bill 5574 nga inpasa ni Yamsuan a gagem a maaddaan ti umdas nga SNED teachers kadagiti pampubliko a pagadalan para kadagiti elementaria ken sekondaria.
Dinakamat ni Yamsuan nga idi School Year 2024-2025 ket umabot iti 391,000 ti learners with disabililties iti pampubliko a pagadalan ngem 6,000 laeng ti SNED Teachers.
Iti agdama, umaw-awat ti SNED teachers ti Salary Grade 14 wenno binulan a sueldo a ₱38,764.
No mapagbalin a linteg ti gakat ni Yamsuan ket maipangato iti ₱45,694 ti sueldo iti kada bulan ti SNED teachers ita a tawen ken maipangato manen iti ₱47,829 inton 2027.
Inpettengna a nasken nga amin ket patas ti oportunidad iti edukasion ken mapasamak laeng daytoy no adda ti umdas nga special needs education teachers iti public schools para kadagiti agad-adal nga adda ti rangkap ti bagina.
