LAOAG CITY – Inlungalong ni Parañaque 2nd District Representative Brian Yamsuan a maisardengen ti panangipawil nga agatendar iti graduation ceremonies dagiti estudiante nga adda pay ti bayadan wenno utang kadagiti pagadalanda.
Nakailanad iti inpasa ni Yamsuan nga House Bill 8618 a gagem nga amin nga agad-adal ket mairaman iti selebrasion wenno graduation rites aniaman ti estado dagitoy iti panagbiag.
Inpettengna a ti edukasion ti agserserbi a namnama para kadagiti naruay a marigrigat a pamilia a Pilipino isu nga adu a nagannak ti agsaksakripisio tapno laeng masigurado a makaturpos dagiti annakda.
Sakup ti gakat ni Yamsuan ti amin a pampubliko ken pribado a pagadalan agingga K-12 level pakairamanan ti higher educational institutions ken technical-vocational institutions.
Naammoan a tapno masigurado dagiti pagadalan a makasingirda ket palubosan ti gakat a saan nga ited ti diploma wenno dadduma pay nga academic documents dagiti estudiante nga addaan pay ti utang.
