LAOAG CITY – Manamnama a ngumato pay ti pakabuklan nga utang ti Pilipinas iti P21.48 trillion apaman a madanon ti katapusan ti 2027, basar kadagiti dokumento ti Budget and Expenditures and Sources of Financing.
Nangatngato daytoy maidasig iti projected debt level a P19.76 trillion para iti 2026.
Kabayatanna, umaboten iti P19.065 trillion ti utang ti national government idi katapusan ti Hunio 2026.
Nangatngato daytoy ti P518.98 billion maidasig iti P18.546 trillion idi Mayo ken P17.267 trillion idi Hunio 2025.
Gapu iti daytoy, kagiddan ti naginad nga economic growth a 2.3% iti umuna a kagudua ti 2026, ngimmato iti 66% ti gross domestic product (GDP) ti debt-to-GDP ratio ti pagilian.
Daytoyen ti kangatoan a tukad iti uneg ti 22 a tawen sipud idi immabot daytoy iti 71.6% idi 2004.
Iti projected a P21.48-trillion nga utang iti 2027, adda ti P14.3 trillion ti aggapu iti domestic borrowing idinto a P7.2 trillion met ti external debt.
Maiyallubog iti projection iti assumption ti panagsukat ti piso ket adda iti P62 ii kada US dollar apaman a madanon ti katapusan ti 2027.
Mainaig iti daytoy, manamnama nga umabot iti P3.304 trillion ti gross borrowings ti national government inton sumaruno a tawen.
Iti nasao a gatad, P2.389 trillion ti manamnama nga aggapu iti domestic sources ken P914.982 billion met iti foreign sources.
Karaman iti plano a domestic borrowing ti P2.329 trillion manipud iti fixed-rate Treasury bonds ken P60 billion manipud iti Treasury bills.
