LAOAG CITY – Inbatad ni Acting Budget Secretary Kim Robert de Leon a saan a dakes ti trinilyon a piso nga utang ti pagilian basta maususar daytoy iti umno a proyekto ken kabaelan a bayadan ti gobierno.
Segun ken ni De Leon, ti importante ket saan a maapapektaran ti dagiti nasken a programa ken serbisio ti pagilian.
Maipalagip nga idi Hunio, immabot iti ₱19.07 Trillion ti utang ti Pilipinas.
Inlawlawagna a dagiti ututangen ti pagilian ket maususar kadagiti prayoridad a proyekto, aglalo kadagiti dadakkel a pasdek kas kadagiti Metro Manila Subway, MRT-3 Rehabilitation Project ken North-South Commuter Railway Project, a manamnama a makaited ti adu a pamastrekan ken amapapintas ti ekonomiya.
Inpetteng ni De Leon a dagiti proyekto ti gobierno ket saan laeng a gastos no diketdi pagpuunan a manamnama a makaited ti benepision iti ekonomiya.
