LAOAG CITY – Adalen pay ti gobierno kangrunaan na ti regional tripartite wages and productivity board ti kiddaw nga ipangato ti sweldo dagiti mangmangged.
Inpasigurado met ni Presidente Ferdinand Marcos Jr. a saan nga iwalin ti gobierno ti kiddaw a maipangato ti sweldo.
Inbatad na kadagiti mangmangged a dumdumnged ti gobierno iti kiddaw da ken siguradwen na a tutukan da daytoy.
Nupay kasta, kuna ti presidente nga adda dagiti banag a kasapulan a timbangen no ania ti agbalin nga epekto na ti pannakaipangato ti sweldo.
Segun iti presidente, masapol nga ikonsiderar ti epekto na daytoy iti panagdur-as ti negosyo, trabaho ken ekonomiya ti pagilian.
Innayon na a na napintas a denggen ti nasasam-it a kari seknan iti wage increase ngem kasapulan a mabalanse ti amin.
Mainaig iti daytoy, inpanakkel ti presidente nga addan ti 16 a rehiyon a nakaipatungpal ti salary increase sipud idi Hunyo ti napalabas a tawen.
Kabayatanna, inrakurak ni Presidente Marcos ti nagduduma a programa ti gobierno tapno matulungan dagiti umili a maalay-ayan ti panagrigrigat kangrunaan na kadagiti paggastusan iti inaldaw.
