LAOAG CITY – Pormalen nga inmandar ni President Donald Trump ti pannakaipataw ti 25% import tax iti amin nga asero ken aluminum a maiserrek iti Estados Unidos, iti major expansion ti agdama a trade barriers.
Ti taripa a mangipangato iti magastos iti importasyon ti metal iti Estados Unidos ket inpatungpal ni Trump iti baet dagiti ballaag a panagibales manipod iti sumagmamano a political leders iti Canada, ti kadakkelan a supplier ti metal ti America, karaman dagiti dadduma pay a pagilian.
Inpaganetget ni Trump nga awan ti makaliklik iti daytoy ken ti ar-aramiden na ket mangpasimple laeng iti pagannurutan a mangrugi intono Marso 12 ita a tawen.
Innayon na a dakkel a banag daytoy gapu ta isu ti panangrugi iti panagbaknang manen ti America.
Mainaig iti daytoy, inpanamnama ni President Trump a nalaklaka ti taripa a maipataw kadagiti nadakamat a proddukto para kadagiti consumers.
Ti Estados Unidos ti kadakkelan nga importer iti asero iti intero a lubong no sadinno a dagiti kadakkelan a suppliers ket ti Canada, Brazil ken Mexico.
