LAOAG CITY – Paigetan ti lokal a gobierno ditoy siudad ti Laoag ti pannakaipatungpal ti Road Clearing Operation ken Oplan Dalus Code.
Daytoy ket babaen iti tulong dagiti 225 a barangay officials manipud iti 80 a barangay ken 24 nga empleado ti gobierno kalpasan a nadutukan dagitoy.
Babaen iti daytoy, naikkan ti bileg a mangited ti citation ticket kadagiti aglabsing kadagiti nasao a pagannurutan.
Segun ken ni Mr. Joey Francisco, Local Government Operations Officer, saan a kabaelan dagiti Traffic Enforcers pakairamanan dagiti Law Enforcers isu a kinasapulanda ti mangdutok tapno naan-anay a maaramid dagiti banag a masapol a maipatungpal.
Kabayatanna, mamati ni Mayor Michael Marcos Keon a dakkel a tulong ti nasao nga addang ti lokal a gobierno tapno maalay-ayan dagiti tumaod a problema kadagiti nagduduma a barangay.
