LAOAG CITY – Naisayangkat ti pannakaiprisentar ti 160 MW Pagudpud Wind Farm iti Brgy. Caparispisan iti ili ti Pagudpud.
Ti Pagudpud Wind ket maikatlo nga ACEN’s wind development ditoy Ilocos Norte a manamnama nga agbalin a kadakkelan a wind farm iti intero a pagilian a Pilipinas nga addaan ti 160 MW a mainstolar ti kapasidad daytoy.
Nakumpleto ti Phase 1 nga addaan ti 80 MW idi umuna a kwarter ti tawen 2023 idinto a ti kumpleto nga 160 MW ket makumpleto iti saan a lumabes intono Disiembre 2025 iti babaen ti Green Energy Auction Program ti Department of Energy.
Agus-usar ti Pagudpud Wind ti latest wind technology, Siemens Gamesa 132 and 145.
Addaan pay daytoy ti 32 wind turbine generators a maka-produce ti 5 MW a power iti tunggal maysa. Makatulong ti Pagudpud Wind ti power a 123,875 a pagtaengan ken maliklikan ti agarup 344,600 metric tons ti carbon dioxide iti kada tawen.
Iti agdama ti ACEN ket nakaipasdeken ti 1000 MW ti renewables iti pagilian nga addaan ti 700 MW a manamnama nga agoperar iti daytoy a tawen.
Mainaig iti daytoy, masarakan ti Pagudpud Wind iti Brgy. Balaoi ken Brgy. Caunayan ili ti Pagudpud no sadino addaan daytoy ti 32 wind turbine generators.
Naammoan a kabayatan ti pannakaaramid ti Pagudpud Wind ket adda ti 1,200 a trabaho ti naidiaya sipod nangrugi daytoy idi tawen 2019 ngem no mairaman ti NorthWind, North Luzon Renewables, ACE ket adda ti pakabuklan a 4,030 a trabaho ti naidiaya iti operations ken construction ditoy probinsia sipod idi tawen 2014.
Ti nasao a programa ket indaulaon mismo ni Presidente Ferdinand Bongbong Marcos Jr.
Adda met ni Mr. Jaime Augusto Zobel de Ayala, ti Chairman ti Chairman ti Ayala Corporation ken Mr. Eric Francia ti President and CEO ti ACEN.
Dagiti dadduma pay nga opisial a nagatendar ket isuda Ilocos Norte 1st District Rep. Ferdinand Alexander Sandro Marcos, Ilocos Norte Vice Gov. Cecilia Araneta-Marcos, Department of Energy Sec. Raphael “Popo” Lotilla ken ERC Chairperson Monalisa Dimalinta.
Malaksid kadakuada, presente pay da Mayor Michael Marcos Keon, Mayor Rafael Benemerito, Sangguniang Panlalawigan Member Dr. Medeldorf Gaoat, Bokal Atty. Donald Nicolas, Bokal Aladine Santos, Bokal Pamela Salenda ken dadduma pay.
Kabayatanna, inpasigurado ni Marcos a natalged ti pannakaipatakder kadagiti renewable energy a maka-produce ti green energy.
Innayon ti Presidente a saan a mapadur-as ti ekonomiya ti Pilipinas no awan ti panag-produce ti renewable energy a pakabenepisiaran dagiti tattao ken iti pagilian.
