LAOAG CITY – Inrakurak ni Retired Police Colonel Royina Garma a ti pannakaisubli ti talek ti publiko iti Philippine National Police ti maysa kadagiti rason no apay nga inbutaktakna iti Quad Committee Hearing ti Kamara ti maipagarup a pudno nga estoria iti likudan ti brutal a drug war ti Duterte Administration.
Inbutaktak ni Garma, dati a Philippine Charity Sweepstakes Office (PCSO) General Manager, iti quad committee a nangipatungpal ti reward system ti administrasion ni dati a Presidente Rodrigo Duterte para kadagiti pulis a mangiwayat ti panangpatay kadagiti karaman iti drug list.
Ti reward system kas ti “Davao template,” ket manipud iti 20 a ribu a pisos agingga iti maysa a milyon iti tunggal hit.
Inbatad ni Garma a dimmanon isuna ti maysa a lawas tapno agpanunot sakbay nga ibagana ti kinapudno iti komite.
Nagsarita met ni House Senior Deputy Speaker Aurelio Gonzales Jr. maipanggep iti inbaga ni Garma para iti reporma ti Philippine National Police.
Kunana nga isu a maiwaywayat ti imbestigasion ket para iti publiko a naurnos ti Philippine National Police ken awan ti extrajudicial killings.
