LAOAG CITY – Inlawlawag ti Bureau of Customs (BOC) a ti pannakaitantan kadagiti kargamento ti bagas ket saan a gapu iti congestion iti Manila ports no di ket pending requirements a kasapulan nga i-comply dagiti consignee.
Daytoy ket kageddan ti panagdanag ti posible a delay iti kargamento a mabalin a makaapektar iti presio ti bagas gapu iti unreleased rice shipments.
Basar iti Bureau of Customs, dumanon iti 258 a shipping containers nga addaan ti bagas ti nagtalinaed pay laeng iti Port of Manila no sadinno 237 kadagitoy ti cleared for release iti panagbayad ti duties ken taxes idinto a ti nabatbati a 21 container ket manarimaan ti pannakaiprosesona tapno ma-clear kalpasan ti panangiprisentar ti Goods Declaration.
Kabayatanna, nagtalinaed ti 630 rice containers iti Manila International Container Port no sadinno 492 ti cleared for release ken 138 ti pending pay.
