LAOAG CITY – Ad-adalen ti gobierno probinsyal ti pannakaituloy ti pannakausar ti permit nga innala dagiti quarry operator bayat ti moratorium period.
Inadmitir ni Provincial Treasurer Mrs. Josephine Calajate a maapektaran ti mapastrek ti gobierno probinsial no saan a ma-extend ti moratorium para iti pannakaipalubos dagiti “quarry operator” nga ag-quarry bayat ti panangiyur-uray da ti permit da.
Inlawlawag na a nasaysayaat no mangipasa ti Sang. Panlalawigan ti gakat para iti pannakaiyalud-ud ti moratorium.
Nupay kasta, inlungalong ni Sang. Panlalawigan Member Atty. Da Vinci Crisostomo, chairman ti committee on laws ti panangitultuloy dagiti quarry operator nga usaren ti naipaay kadakuada a permit kabayatan ti “moratorium”.
Inbatad na nga iti panagkita na nupay nagngudon ti moratorium ket adda met ti innala dagiti maseknan a permit, mabalin ti local finance wenno ti executive department ti mang-formulate ti executive order wenno sistema a pagbasaran ti opisina ti provincial treasurer tapno mamantener ti koleksion.
Inkalintegan na a no nakaala dagitoy ti permit kabayatan ti moratorium period ket saan da a naala ti pakabuklan ti maipalubos nga alaen da gapu iti problema a ginubuay ti COVID-19 a saan da a pannakaisayangkat iti operasyon da ket mabalin siguro nga usaren da ita a tawen.
Inbunannag ni Crisostomo a maysa a rason ti moratorium ket para iti pannakaipaay ti gundaway kadagiti maseknan a mangpataud kadagiti dadduma pay a kasapulan a dokumento tapno maipaayan da ti Governors permit a maiyallubog iti Revised Provincial Quarry Ordinance.
Innayon na nga iti agdama ket adda ti plano a maamendaran ti revised ordinance gapu ta maobserbaran da ti kaadda ti problema iti monitoring ken koleksyon.
Immun-una ngem iti daytoy, inpakaammo ni Calajate a nakakolektar ti probinsya manipud iti buwis iti darat ken batbato ken dadduma pay a “quarry products” manipud idi bulan ti Enero agingga ti Hunio iti 3, 265, 760 idinto a ti target a makolektar ita a tawen 6.5 a million a pisos.
