LAOAG CITY – Inlawlawag ni Gov. Matthew Marcos Manotoc a nakadepende iti National Electrification Administration ti pannakaiyalud-od ti kontrata ni Acting General Manager ti Ilocos Norte Electric Cooperative a ni Mr. Cipriano “Perry” Martinez.
Naobserbaran ni Gov. Manotoc a sipod nagbalbaliw ti mangimaton ti nasao a kooperatiba ket in-inot a bimmaba ti singir ti kuryente a dakkel a nakalag-anan ti rikna ken bulsa dagiti naruay a consumers ditoy probinsia.
Naripar pay ti Gobernador a kabayatan ti panagakem ni Martinez ket ad-adda a naipadanon ti napintas a serbisio para kadagiti umili babaen ti panangipaay ti naan-anay a panawen sakbay a maputed ti linya ti kuryente ti maysa a pagtaengan.
Maipalagip a nangrugi ti panagtakem ni Martinez kas Acting General Manager iti Ilocos Norte Electric Cooperative idi Setiembre iti napalabas a tawen mo sadino agngudo daytoy inton bulan ti Marso iti agdama a tawen.
Kabayatanna, kiniddaw pay ni Gov. Manotoc ken ni Martinez ti nayon a panagbaba ti singir ti kuryente tapno mabang-aran ti nadagsen nga ibakbaklay a paggastoan dagiti kailian.
