LAOAG CITY – Manarimaan ti panangplano ti gobierno probinsial ti Ilocos Norte iti pannakaiyakar ti Himala sa Buhangin.
Daytoy ti inpakaammo ni Gov. Matthew Marcos Manotoc.
Inbatadna a manipod iti bulan ti Mayo nga orihinal a bulan a pannakaisayangkatna ket kalikagum ti gobernador a maiyakar daytoy iti bulan ti Nobiembre.
Kunana a daytoy ket gapu iti limitado nga aktibidad a maaramid iti Paoay Sand Dunes gapu iti kinabara iti paniempo kadagitoy a bulan a rason a mamati daytoy a napinpintas no maikabil iti Nobiembre tapno mas nasapsapa ket ad-adu ti programa a maaramid a mangipaay ti ragsak kadagiti umili ken dagiti bisita.
Innayonna a daytoy ket addang tapno mapagtalinaed a nalatak ken mas mapapintas pay iti nasao a music festival nga ibilangna a maysa kadagiti daydaywen dagiti tattao manipod iti nadgumaduma a paset ditoy pagilian ken iti dadduma a suli iti lubong.
