LAOAG CITY – Inbatad ni Dr. Shirley Agrupis, ti Presidente iti Mariano Marcos State University (MMSU) a dakkel ti epekto na kadakuada no saan a mapatgan ti apela ni Commission on Education (CHED) Chairman Prospero De Vera iti Department of Budget and Management (DBM).
Daytoy ket mainaig iti pammilin ti DBM a saan a panannakagaraw wenno pannakakissay ti 35 a porsiento ti pondo ti CHED tapno mailatang iti COVID-19 response.
Inlawlawag ni Agrupis a no saan a patgan ti DBM ti kiddaw ni De Vera ket isuda ti kangrunaan a maapektaran ken ibilang na a kadakkelan a karit kadakuada.
Inbaga ni Dr. Agrupis a ti State University and Colleges ket uppat ti pangal-alaan da ti pondo, karaman ditoy ti Fund 101 wenno general appropriations, Fund 161 wenno Locally Generated Funding, Fund 184 ket isu dagiti pondo nga ited ti Funding Agencies da ken ti Fund 164 ket tuition fees dagiti estudyante.
Inpakaammo na a ti Fund 164 ket mausar para iti advancement ti edukasyon dagiti ubbing a pangalaan da ti pagbayad dagiti part-time, dagiti agubra iti support services ti panangpataray da ti higher education, mutual fund dagiti estudyante, pondo a mausar kadagiti iyuswat da nga aktibidad, seminar dagiti mangisursuro, conferences ken dadduma pay.
Segun ken ni Dr. Agrupis, ti kangrunaan a maapektaran iti inparuk-at a memorandum ti DBM ket ti Fund 164 a tuition fees dagiti estudyante.
Nupay kasta, kuna ti MMSU president a gapu iti Universal Access to Quality Tertiary Education Act ket saan dan nga agsingir kadagiti ubbing ken sumrek da a libre ngem i-reimburse kadakuada ti CHED ti bayadan koma dagiti estudyante.
Gapu iti daytoy, inbatad ni Agrupis a basar ken ni De Ver, no saan a patgan ti DBM ti apela na ket kapilitan nga agsingir dagiti State Universities and Colleges (SUC) ti matrikula dagiti ubbing.
