LAOAG CITY – Inbatad ni Supt. Floro Obrero, ti Provincial Fire Director ti BFP ditoy Ilocos Norte a dakkel ti epekto iti ipapaay da a serbisyo ti pannaka-lock in dagiti sumagmamano a personnel.
Segun kenni Obrero, iti agdama ket agtultuloy ti pannakalock in dagiti personnel iti BFP-Currimao kalpasan ti panagpositibo ti maysa a bombero.
Innlawlawag na a gapo iti daytoy ket awan pay laeng ti office transaction ken iti panagresponde no adda ti mapasamak nga uram ket agdepende iti insidente no kasano ti pannaka-expose iti ruar dagiti personnel.
Kunana a nakasagana met a tumulong dagiti kabangibang nga istasyon ti BFP no adda ti nasken a marespondean.
Mainaig iti daytoy, kunana nga adda laeng ti 270 a personnel ti BFP ditoy probinsya ken 13 kadagitoy ket manarimaan ti schooling da, dagiti agduduty iti borders, adda dagiti naipatulod iti NCR para iti covid vaccination ken intended national swabbers.
Gapo iti daytoy, kunana a kiniddaw na iti Regional Office nga ado ti maideploy ditoy probinsya a personnel manipud iti 124 a na-recruit ken manarimaan ti orientation na iti Regional Headquarters.
