LAOAG CITY – Inbatad ni Brgy. Kagawad Elmer Longboy iti Brgy. 23 iti ili ti San Nicolas a naiget ti pannakamonitor iti nasao a barangay.
Daytoy ket kalpasan a nagpositibo iti covid-19 dagiti sumagmamano a kabarangayanna partikular da IN-C655, lalaki nga agtawen ti 33, cargo helper kenni IN-C688, lalaki nga agtawen ti 54 ken maysa a pastor iti nasao a barangay.
Segun ken ni Longboy naiget ti panagsursor da tapno mamonitor nu masursurot ti social distancing ken dadduma pay a pagalagadan kontra iti covid-19.
Mainaig iti daytoy, kuna na nga agtultuloy ti contact tracing kadagiti nakapulapol dagiti pasyente nu man pay addan dagiti immuna a dimmalan iti swab test a primary contact dagitoy.
Immunan nga inbunnag ti barangay kagawad a posible a napan nakigimong ni IN-C655 rason iti posible a panaginnakar da iti virus iti pastor a ni IN-C688.
