LAOAG CITY – Inadmitir ni Fr. Melchor Palomares, ti pannakangiwat iti Diocese of Laoag a nagkurangda iti panangipakaammo iti lokal a gobierno iti ili ti Sarrat nangruna ken ni Mayor Remigio Medrano maipanggep iti panakaikabil ti holy relic ni Niña Ruiz Abad iti uneg ti Sta. Monica Church iti nasao nga ili.
Segun kenkuana, daytoy ket kalpasan a makita ti Diocese of Laoag nga awan ti rumbeng nga ipakaammo iti lokal a gobierno gapu ta awan met ti risgo a makitada a maipaayna iti aglawlaw ken dagiti tattao.
Inbatadna a ti pannakaikabil ti nabatbati a paset ti bagi ni Niña wenno maaw-awagan kas holy relic iti uneg ti simbaan ket paset iti proseso ti cause of cannonization iti nasao a servant of God.
Kunana nga idi kinalida iti nakaitaneman ni Niña wenno ti maaw-awagan nga “exhumation process” ket adda dagiti kameng ti Department of Health Regional Office gapu ta ipagarupda ket saan pay unay a nagrupsa iti bangkayna.
Inlawlawagna nga apaman a nalukatanda ket nakita a naan-anay daytoyen a nagrupsa ken adda laengen ti sumagmamano a tulang iti nabati ken ti naipegket a dadduma a paset ti kawesna idi isuna ket naimansayag.
Gapu iti daytoy, inpakaammona a nakita dagiti kameng ti Department of Health nga awanen ti risgo a maipaay daytoy nangruna iti salun-at dagiti tattao rason a saanen a kasapulan pay ti mangala ti permit ti nasao nga ahensia iti gobierno.
Inlawlawagna nga apaman a nakali ti holy relic ni Niña ket ideretsoda koma daytoy iti uneg ti simbaan ngem adda ti iyur-urayda pay laeng a dokumento manipod iti Rome, Italy a maaw-awagan met a nihil obstat.
Nupay kasta, apaman a naawatda ti nasao a dokumento ket inyakarda nga insigida iti uneg ti simbaan ken kunana a daytoy ket normal a pagannurutan iti simbaan.
Mainaig iti daytoy, kunana nga awan ti gagemda a lukoen dagiti tattao gapu ta awan met ti makitada a dakes a mapasamak no maikabil daytoy iti uneg ti simbaan.
Innayonna a plano ni Rev. Renato Mayugba, ti Bishop iti Diocese of Laoag nga agturong iti opisina ni Mayor Medrano tapno makisarita maipanggep iti nasao a banag.
Kabayatanna, naammoan a maipapan iti saan a pannakaipalubos iti pannakaiserrek ti holy relic ni Niña ket awan karbengan iti asinoman a mangipawil gapu ta daytoy ket maysa a pribado a sanikua ken ipakaammoda laeng kadagiti maseknan ngem saan a kasapulan ti pammalubosda.
Maipalagip nga inpetteng ni Mayor Medrano ti pannakadismayana ti saan a panangipakaammo ti Diocese of Laoag iti pannakaikabil ti holy relic ni Niña Ruiz Abad iti uneg ti Sta. Monica Church.
