LAOAG CITY – Saan a mapnek ni Fr. Randy Manicap, pannakangiwat ti Kaammoyo ti Kappia iti ar-aramiden ti gobierno para kadagiti Pilipino.
Daytoy ti nabagas a sarita nga inibbatanna kagiddan ti pannakaisangkat ti maikapat nga State of the Nation Address wenno SONA ni Presidente Ferdinand Marcos Jr. ita nga aldaw.
Segun kenkuana, kurang ti tignay ti gobierno isu a saan a marikna ti naruay a Pilipino ti panagrang-ay ti panagbiagda.
Inbatadna a masapul nga ad-adda pay a tutukan ti gobierno ti pannakaipaay ti tulong kadagiti marigrigat kangrunaanna kadagiti kasapulan dagiti mannalon ken mangngalap.
Inlawlawagna a nasken laeng a kanayon nga ipangpangruna ti pannakaipangato ti sueldo dagiti mangmangged gapu iti kinangina dagiti kangrunaan a magatgatang.
Kunana a saan nga agpadiktar ken ni United States President Donald Trump tapno saan a maapektaran dagiti rumbeng a maipatungpal babaen iti administrasionna.
Mainaig iti daytoy, kalikagum ni Manicap a maikkat ti confidential fund ti Office of the Vice President ken dagiti dadduma pay nga opisina to gobierno.
Inpettengna a masapul nga agbalin a seryoso ti pannakatratar ti impeachment trial kontra ken ni Vice President Sara Duterte gapu ta rumbeng laeng a maammoan ti publiko no pudno wenno saan dagiti maiyak-akusar kenkuana.
Inpalgakna nga umannugot daytoy iti panagsubli ti Pilipinas iti International Criminal Court.
Innayonna a kaaduan a mannalon ket saanda a bukud ti daga a taltalonenda isu a nasken a maipaayan dagitoy ti naan-anay a tulong.
Kabayatanna, no maiyarig isuna kas maysa a College Professor, inikkanna ti tres (3) a grado ni Pres. Marcos.
