LAOAG CITY – Nasugatan ni Somalia government spokesman Mohamed Ibrahim Moalimuu iti napasamak a panagbettak iti ciudad ti Mogadishu.
Segun iti report, napasamak ti panagbettak iti mismo a ruwar ti pagtaengan da Moalimuu.
Agpapan ita ket saan pay a nalawag no siasinno ti responsable iti napasamak a panagbettak ngem iti inisyal a report ket aramid daytoy ti maysa a suicide bomber.
Maipalagip a namin-adon a daras a nakalasat ni Moalimuu kadagiti naglabas a panagbettak ken panagatake.
Naamoan a ti naudi a panagbettak a nakairamanan ni Moalimmu ket walo a tattao ti pimmusay no sadinno a ti adda iti likudan ti insidente ket ti Islamist militant group al-Shabab ken napasamak daytoy iti asideg ti Somali Air Force camp ken ti international airport.
Ti grupo nga Al-Shabab ket nabayagen a kalablaban ti gobierno ti Somalia.
