LAOAG CITY – Inlawlawag ni Department of the Interior and Local Government (DILG) Secretary Jonvic Remulla a nakadepende iti diplomatic channels ken legal a proseso ti Department of Foreign Affairs (DFA) ti pannakapagawid ni dati a Congressman Zaldy Co iti Pilipinas.
Iti maysa nga interview, inlawlawag ni Sec. Remulla nga awanen iti hurisdiksiyon a ti nasao nga isyu no di ket iti Department of Foreign Affairs ti agaramid ti addang tapno maisublin ditoy pagilian ti dati nga agpanpanday linteg.
Segun iti sekretaryo, saan pay a naireport ni Co iti International Criminal Police Organization (Interpol), gapu ta nakadepende daytoy kadagiti kaso a pormal nga ipila kontra kenkuana.
Iti agdama, adda ti standing arrest warrant kontra ken ni Co gapu iti naipila a corruption ken malversation of public funds charges kontra kenkuana iti Sandiganbayan.
Kabayatanna, inkeddeng ti Sandiganbayan Sixth Division ti panangrugi ti trial intono Marso 3 ita a tawen kontra ken ni Co ken 15 a sabsabali pay mainaig iti maipagarop a substandard a P289-milyong flood control project iti Naujan, Oriental Mindoro.
