LAOAG CITY – Inlawlawag ni Dr. Alan Taylan dagiti napateg nga aramiden ken obserbaren ti publiko tapno maliklikan nga agpasar kadagiti sakit no panawen ti kalgaw.
Segun kenni Taylan, masapol a papigsaen ti bagi wenno naturalesa, panaginom ti danom tapno saan a madehydrate ken ammoen a nasayaat ti tumtumaren.
Kunana a no napudot ti panawen ket mabalin a matrigger ti asthma dagiti addaan iti kastoy gapo iti panagbaliw ti panawen, natapok ken dadduma pay a makaigapo iti daytoy.
Inbatad na a dagiti datin nga addaan ti asthma ket ammo dan no anya ti mabalin a mangdegdeg iti kastoy ken ti napateg ket ti reliever ken controller.
Karaman pay kadagiti mabalin a mapasaran iti panawen ti kalgaw ket ti panagtuko, sore eyes, flu wenno trangkaso, food poisoning, kamuras ken skin condition.
Malaksid kadagitoy, inbatad na a mabalin a mapasaran pay ti tao ti hyperthermia no sadinno ket bumara ti bagi wenno agoverheat ken no saan a maprebentaran ket posible ti heat stroke. Kunana a mabalin pay nga agpasar ti gabbi dagiti tattao no nabara ti panawen no sadinno dagiti sintomas iti daytoy ket kas met laeng iti trangkaso agingga a bumsog ti pingping ken no nakapsot ti naturalesa ti maysa a tao ket mabalin a maulit a maaddaan iti daytoy.
