LAOAG CITY – Nagpanawagan ti mangidadaulo ti World Health Organization a ni Tedros Adhanom Ghebreyesus iti Estados Unidos a maminsan manen a panunuten ti nalawa a panagkissay iti pundo para iti salun-at gapu ta mabalin daytoy a mangitunda ti minilyon nga indibidual a pannakatay.
Inbatadna a mabalin a ngumato ti sumurok 10 a milyon a kaso ti HIV ken dumanon iti tallo a milyon dagiti matay gapu iti daytoy.
Inpasardeng ni United States President Donald Trump ti agarup amin a tulong manipud iti pagilianda pakairamanan ti pundo para iti USAID ken CDC a pagam-amkan ti sangalubungan.
Kuna ni Tedros, mabalin a ngumato ti kaso ti malaria ti 15 a milyon nga addaan ti 107 a ribu a pannakatay ita a tawen a nasayang ti 15 a tawen a panagdur-as.
Gapu iti panagsardeng ti PEPFAR, maysa a programa kontra iti HIV, nagsardengen ti serbisio iti sumurok 50 a pagilian ken walo a pagilian ti dandanin a maibusan ti antiretroviral drugs.
Napeggad met ti sangsangoen dagiti pasiente ti tuberculosis iti siam a pagilian a bimmagsak ti suplay ti agasda.
Ti WHO Global Measles and Rubella Network a nakadepende iti pundo ti Estados Unidos ket dandanin nga agrikep iti baet a maminsan manen a panagraira ti kamuras.
Inallukoy ni Tedros ti Estados Unidos a siguradoen nga adda ti naurnos a pannakaiyakar ti pundo tapno maliklikan ti nakaro nga epekto.
Nagpanawagan pay isuna kadagiti dadduma a donor ken gobierno a papigsaen iti bukudda a benneg iti salun-at.
