LAOAG CITY – Kinimpirmaran ni Fire Chief investigator Roxanne Parado, ti mangidadaulo ti BFP ditoy ciudad ti Laoag a bulb starter ti makagapo iti napasamak nga uram iti maysa a pagkaseraan iti Brgy. 11 ditoy ciudad.
Segun iti inisyal nga imbestigasyon da, posible a nabayba-an a sipapasged ti florescent lamp iti maysa a kwarto iti nasao a pagkaseraan a nangitunda ti uram.
Dagus met a nasebseban ti uram babaen ti maysa kadagiti agkasera a karruba met laeng ti maur-uram a kwarto.
Naamoan nga alisto a nauram ti kwarto gapu ta plywood laeng daytoy.
Kabayatanna, maipagarop nga umabot ti 5 a ribo a pisos ti balor amin dagiti nadadael a gamit ti agkasera gapu iti nasao nga uram.
