LAOAG CITY – Inpakaammo ni Ms. Mylene Isabel Pascual, mangidadaulo ti City Environment and Natural Resources Office ditoy ciudad ti Laoag a dakkel a benipisio iti pannakipaset iti Earth Hour intono Marso 22 ita a tawen.
Segun kenni Pascual, dakkel a tulong para iti panangprotehir iti aglawlaw ti pannakipaset iti Earth Hour.
Inpetteng na nga iti las-od ti maysa nga oras nga iddepen dagiti silaw ket dakkel a makatulong iti pannakaalay-ay ti mapaspasaran a nakana a kinabara iti lubong.
Kunana a babaen pay iti nasao nga aktibidad ket maipalagip iti tunggal maysa iti panagusar iti alternative technology kas iti solar ken dadduma pay.
Kabayatanna, ginutigot ni Pascual ti publiko a makipaset iti tinawen nga aktibidad nga Earth Hour intono Marso 22, mangrugi iti oras ti 8:30 agingga iti 9:30 ti rabii.
