LAOAG CITY – Inpasigurado ti Presidential Anti-Organized Crime Commission iti Korean community a nagtalinaed nga adda iti uneg ti pagilian a mangipatpatungpal ti gobierno ti ad-adda a napaigetan ti tignay kontra kadagiti krimen iti pagilian.
Inbatad ni Presidential Anti-Organized Crime Commission Chaiperson Executive Secretary Lucas Bersamin a nangidatag ti komisionda kadagiti plano tapno mapagtalinaed a natalged dagiti Korean nationals kabayatan ti kaaddada ditoy Pilipinas.
Naammoan a dagiti sumagmamano a karaman a naidatag ket ti revitalization dagiti security desk nga isu ti mangipaay ti police visibility ken naiget a koordinasion kadagiti lokal a gobierno para iti kinatalged dagitoy.
Inkari ti Presidential Anti-Organized Crime Commission nga ad-adda a paigetanda ti seguridad kadagiti lugar kas ti Angeles City, Manila ken Cebu a kangrunaan a pagturturongan dagiti ganggannaet.
Maipalagip a naaddaan ti panagsinnarita iti nagbaetan ti Pilipinas ken ti United Korean Community Association no sadinno a kiniddaw ti organisasion a maaddaan ti napigpigsa a reinforcement ti Philippine government iti panagpatalinaed ti kinatalged dagiti bumisbisita ditoy pagilian.
