LAOAG CITY – Pabor ni Mrs. Brenda Rosales, ti Parent Leader ti Pantawid Pamilyang Pilipino Program wenno 4P’s iti Brgy. 48-A Cabungaan ditoy siudad ti Laoag a napinpintas no bagas ti maibunong imbes a kuarta ti ipaay a tulong para kadagiti padana a benepisiario ti Pantawid Pamilyang Pilipino Program.
Nupay kasta, inpakaammona nga adda ti naiyalokar nga 600 a pisos kas rice subsidy para iti maysa a bulan nga aw-awatenda a financial assistance manipod iti Department of Social Welfare and Development Office.
Segun kenkuana, umannugot daytoy a bagas lattan ti maiyawat kadakuada imbes a ti 600 a pisos a kuarta a naiyalokar para iti rice subsidy gapu ta igatangdanto met laeng ti bagas ti naited a kuarta.
Inlawlawagna a rumbengda nga ipakita ti resibo ti ginatangda a bagas kas pammaneknek a naigatang t kuarta iti umiso a wagas.
Inbatadna a saan met a mabalin a ti buo a kuarta nga aw-awatenda ket maited amin a bagas gapu ta masapolda ti kuarta a panggastos kas ti panagbayad kadagiti kasapulan dagiti annakda iti pagadalan ken dadduma pay a paggastoan.
Mainaig iti daytoy, kunana nga adda ti educational assistance a naiyalokar para kadagiti annakna nga agad-adal no sadino 300 a pisos iti kada bulan para iti elementarya, 500 a pisos iti kada bulan para iti sekondaria idinto a 700 a pisos iti kada bulan para iti senior high school.
Kabayatanna, naammoan nga agtagibalay ken agpaspasada iti tricycle dagiti agasawa a benepisiario ti Pantawid Pamilyang Pilipino Program.
Maipalagip a naiget nga ad-adalen ti Department of Social Welfare and Development ken Department of Agriculture ti nailungalong nga addang.
