LAOAG CITY – Inrakurak ti Commission on Elections a dumanonen iti 200 a party-list groups ti nagaplikar nga agparehistro para iti umas-asideg a 2025 midterm elections.
Segun ken ni Commission on Elections Chairman George Erwin Garcia, no bilang naikabilen ti pagwarnakan ken awan ti petision a naipila tapno lappedan ti aplikasion, kualipikadon ti party-list group a makipaset iti 2025 elections.
Naammoan a dagiti organisado a grupo laeng a nakarehistro iti Commission on Elections ken nangipila ti Manifestation of Intent to Participate ti mabalin a makipaset iti party-list elections inton sumaruno a tawen.
Kabayatanna, inbatad ti Commission on Elections no adda dagiti saan nga umannugot iti grupo nga agpaidasig inton 2025 elections, mabalinda a mangipila ti petision iti Komisyon iti uneg ti sangapulo nga aldaw manipod iti petsa a nalpas.
Kabayatanna, bayat a maisursurat daytoy a damag ket adda ti 145 nga aplikante ti naaprobaran kas party-list groups a makipaset iti May 2025 elections.
