LAOAG CITY – Nauram ti maysa a pasdek panganan iti Barangay 18 iti ili ti Bacarra.
Segun ken ni Senior Fire Officer 2 Bernard Layugan, Deputy Municipal Fire Marshal ken Chief Investigator ti Bureau of Fire Protection iti ili ti Bacarra, agarup alas dose ti tengngat rabii idi napasamak ti insidente.
Inbatadna a basar iti inisyal nga imbestigasionda, rumrummuar a nangrugi ti apoy iti amianan a daya ti nasao a pasdek panganan.
Inlawlawagna nga alisto a nagramram ti apoy gapu ta naaramid laeng ti labig ken kawayan ti pasdek panganan.
Kunana a manarimaan pay laeng ti pannakisarsaritada iti akinkukua ti pasdek panganan tapno maammoan no mano amin ti balor dagiti nadadael iti pannakauramna.
Inpettengna nga iti agdama ket agtultuloy ti iwaywayatda nga imbestigasion no ania ti namunganayan ti nasao nga uram.
Innayonna nga awan ti makitkitada a rason a mabalin a nairanta ti pannakauram ti pasdek panganan gapu ta awan met ti malagip ti akinkukua nga adda dagiti nakaririna wenno napagurana a posible a nangaramid ti insidente.
Kabayatanna, naammoan nga awan ti nairaman a dadduma a pagtaengan idi napasamak ti uram.
