LAOAG CITY – Ballaigi ti pannakapapessa dagiti itlog ti pawikan babaen ti naan-anay a pannakabantay ti lugar a nagitlogan ti pawikan idi bulan ti Marso iti paset ti Sexy Beach, iti Brgy. Estancia iti ili ti Pasuquin.
Segun kenni Barangay Chairman Romel Ranay, nagpessa dagiti itlog ti pawikan kalpasan a nasurokan ti 70 nga aldaw sipud ti panagitlog ti ina a pawikan idi Marso 9, 2022.
Kuna na nga adda met dagiti sumagmamano nga ibbong nga itlog ti pawikan ngem ad-ado met laeng dagiti nagpessa ken naiturong da a naipan iti baybay.
Inbatad ni Ranay nga umabot iti 66 nga itlog dagiti nagpessa manipud iti nasurok 70 nga itlog.
Naamoan a maminsan wenno mamindua a daras nga adda ti agitlog a pawikan iti igid ti baybay iti uneg ti maysa a tawen.
Innayon ni Ranay a ti Sexy Beach ket agbalbalinen a sanctuaryo dagiti pawikan nga agitlog rason a nasken laeng iti pannakaipaay ti naan-anay a proteksiyon dagitoy.
